(( أنا الحاج ابو خليل من كفر البطيخ ، أناشدكم عاوزها هيفاء بيضاء موزاء )) 
(( عاجل جدا لاصحاب القلوب الرحيمة موزة قليلة تمنع بلاوى كتيرة )) 
حد كده وهو قاعد بيلعب بالرموت فى أى قناة أغاني أو غيرها لمح حكاية زى دى ..أكيد لازم تلمح لان المسخرة الموجودة فى شريط الاهدائات الموجود فى أى قناة فضائية لازم يخليك تسيب اى حاجه وتقعد تتابع الحوارات والاشتغالات الموجودة فى الشريط اللى بيدور ..وبيدور معاه الحوار اللى فى الغالب بتبأه محتاج كوباية شاى وانت شغال متابعة لهذا الحوار الهادف والبناء ..
والواحد فعلا ملاحظ ان الشريط ده تحول لشىء من اسواق النخاسة ، فعندك مثلا أم خيشة باعتة على الشريط بتبحث عن راجل مش بيدخن وكسيب ، وفلان الفلاني عاوز واحدة مش نكدية .. أنا شخصيا بيتهيئلى يا اخوانا ولا واحد ولا واحدة من اللى بيبعتوا دول عاوزين يتجوزوا بجد .. واللى بيحصل تهيسس وتنفيس عن حاجات فى نفسيتهم .. وبرده اظن ان واحدة عاوزه تتجوز مش حتبعت لشريط فى قناة اغاني علشان تتجوز ..
طب سبكم من صورة الجواز دى ، ده فيه كمان اللى انقح من كده تلاقى فيه دعاره تلاقى فيه خيانات زوجيه تلاقى فيه تظبيطات عاطفيه ..وشوف المسخرة واحدة باعته أنا متجوزة جديد ومفيش خلاص توافق عاطفى بينى وبين جوزى .. طب ايه المفروض من الناس اللى بتتفرج مثلا .. ندورلها على عريس ولا نطلعها واحد منا شغال مأذون ويروح يطلقها ..
وحتلاقى برده فى الشريط اللى تايه واللى محشش واللى كاره نفسه ، وبعدين أهم حاجه باه انك تلاقى واحدة ترمى جملتين وتمشى تلاقى وراها مليون رسالة ، واحدة تقولك أنا فلانه الفلانية وتقعد توصف فى نفسها وصف يخليك تقوم من على الكرسى لو كنت قاعد ، أو تقعد لو كنت واقف
المهم وفى الاخر تطلب زوج متدين ..ي