لو الهرم الاكبر إتسرق .. مين اللى حيمسح دموع أبو الهول !!

المفروض إن أى حرامي يبتكر طريقة جديدة من طرق السرقة أنه يسجل الطريقة دى كبراءة اختراع .. علشان بس اخوانه الحرامية ميسرقوش افكاره .. مع انى عارف اساسا ان الحرامية ولاد بلد وجدعان أوى ومش بيقطعوا فى بعضيهم وبيصونوا العيش والحلاوة اللى طفحوه فى زنزانة واحدة .. لكن برده ميضرش وحرس ولا تخونش ..انا بقول الكلام ده ليه .. لأن يا جماعة لازم نشيد بأى طريقة جديدة ومبتكرة ونشجع المواهب .. وزى ما احنا عارفين ان السرقة والفهلوة دى مواهب برده .. والحرامي يا ولداه ما بيصدق يخترع طريقة جديدة ومبتكرة  تعدى من ورا قفا الضحية .. رغم أن زمان كان الحرامية غلابة وعبط .. كنت تلاقى الحرامي اللى بيطلع اتوبيس اللى أزحم من سوق العبور على امل أنه فى الزحمة دي يمكن يعلق محفظة واحد .. رغم انه فيه نسبة مخاطرة ان لو بسلامته اتقفش فعينه مش حتشوف إلا النور وقفاه حيكون أحمر من اللحمه الضاني فى العيد الكبير .. ولأن الحرامي أيامها كان ماشى بمبدأ الشاعر السكير بتاع ( دع عنك لومى فإن اللوم اغراء وداونى بالتى كانت هى الداء) فكان مش بيحرم وكان غالب الامر أن كل واحد فيهم مكنش بينام مرتاح قرير العين إلا لما يتصبح بالقفيان من الشعب فى الاتوبيس الصبح وبالمعاملة الرقيقة التى لا تخلو من المد على الرجلين وعلى الــ .. فى أقسام الشرطة  .
دى باه كانت الصورة الخيبة للحرامي .. دلوقتى على رأى الفنانة التائبة حلا شيحا (( خلاص خلاص )) .. بأه فيه الحرامي المودرن .. حرامى اتربي فى عالم البيضة والحجر .. تلاقيه شيك وحاطط برفان من بتاع بلاد بره وبدله وجرفاته وأوعى وشك باه .. وكلنا فاكرين ( الريان) وشركات توظيف الاموال والنصب اللى حصل .. وعلى رأى (عادل إمام) فى فيلم (كراكون فى الشارع) لما كان بيتكلم عن الحاج نادى بتاع كيس البلح (( والذبيبة طارت والنور اختفى وقال انت ملكش فلوس عندي )) .. اهى شركة توظيف الاموال مفروض تسجل كبراءة اختراع .. براءة اختراع فى النصب وشغل حلا حوش .. وبرده أول رجل اعمال أخد قرض وفلسع مفروض انه يسجل الفكرة دى كبراءة اختراع له شخصيا .. ويرفع كمان قضايا على اى رجل اعمال تاني اخد فلوس وكت على اساس انه سرق فكرته .

طب بلاش دول وتعالوا شوفوا فكرة النصب الجديدة دى اللى حصلت من فترة مش كبيرة يعنى ، علشان تعرفوا ان البلد بخير وعقول شبابنا لسه زى الفل .. طبعا عارفين نصاب الجيزة .. الراجل ده اخترع فكرة جديدة لنج فى عالم النصب والراجل ده كان شعاره الدائم اللى ماشى عليه كل الحرامية تقريبا وهو (( الطماع فريسة للحرامي)) .. الراجل ده كان بيشترى العقارات والاراضي و السيارات بضعف ثمنها .. بس ايه بأه كان بيدفع الربع كمقدم بس او اقل كمان على انه يسدد الباقى كأقساط .. بعد كده يبيع اللى اشتراه بالسعر الطبيعى ويكت ويفلسع من غير ما يسدد باقى الاقساط .. اهى دى فكرة جديدة استغل فيها طمع بعض الناس .. يعنى اللى كان عاوز يبيع شقته بمليون جنيه يقوله حشتريها ب2 مليون على شرط تاخد الربع والباقى اقساط ... بعدين يشترى الشقة بالربع ويبيعها بالثمن الاصلى لها ويكت من غير ما يدفع باقى الاقساط .. الراجل اتعكش فى الاخر بس أكيد فكرته الجديدة دى لازم تسجل بأسمه كبراءة اختراع ولا ايه .. ولو سيادتك اتصورت مثلا ان اى طريقة حرامي مش حتتكرر تاني لانها اصبحت مفقوسة ودقة قديمة أقولك لا يا عمنا بدليل أن عندنا مادة بتقول القانون لا يحمى الطرابيش أقصد المغفلين .. فطول ما فى ناس لابسة السلطانية حتلاقى نفس الافكار بتتكرر ونفس المغفلين هم الضحايا .

طيب إذا كان طبيعى أننا نسمع عن واحد اتسرق أو شركة اتسرقت لكن الغريب أنك ممكن تسمع أن الحكومة اتسرقت .. دى غريبة جدا .. قرأت خبر غريب جدا فى أحد المجلات بيقول أن فيه كابل اتسرق من السعد العالى .. الكابل ده طوله 300 متر ووزنه 6 اطنان وتكلفته 210 جنيه .. طبعا الخبر غريب أن يتم سرقة كابل من السد العالى بالتكلفة دى والحجم ده فمسالة عاوزه وقفه .. لان ده مش كابل كهرباء فى زقاق من زقايق إمبابة .. المهم والمضحك أنه وفقا لرواية الاستاذة (ناهد فريد) فى مجلة صباح الخير خرج أحد المسئولين ليقول ان الكابل المسروق مش حيأثر على محطة الكهرباء .. وكأن هى دى القضية ! القصية هى أكبر من كده .. ازاى يتسرق كابل كهرباء من صرح خطير زى السعد العالى!  دى هى القضية لان المفروض ان السد متأمن كويس .. واساسا ازاى 6 طن تتسرق بسهولة اوى كده .. بكره نصحى نلاقى الهرم الاكبر اتسرق بس المشكلة بأه مش فى سرقة الهرم الاكبر .. المشكلة فى ابو الهول مين حيمسح دموعة على سرقة الهرم الاكبر ! ..اتفرج يا سيدى الحكومة بتتسرق زيها اهو زى الشعب ...عاوزين مساواة ايه اكتر من كده .. مش مصدقنى .. كان فيه زمان كوبرى الحرامية  نزلوا عليه بالليل ومعاهم لحام وسيحوا الحديد بتاع سور الكوبري وخدوه وباعوه ...مش بقولك براءة اختراع .. البلد مليانة مواهب .

((كيـمو))