والواحد فعلا ملاحظ ان الشريط ده تحول لشىء من اسواق النخاسة ، فعندك مثلا أم خيشة باعتة على الشريط بتبحث عن راجل مش بيدخن وكسيب ، وفلان الفلاني عاوز واحدة مش نكدية .. أنا شخصيا بيتهيئلى يا اخوانا ولا واحد ولا واحدة من اللى بيبعتوا دول عاوزين يتجوزوا بجد .. واللى بيحصل تهيسس وتنفيس عن حاجات فى نفسيتهم .. وبرده اظن ان واحدة عاوزه تتجوز مش حتبعت لشريط فى قناة اغاني علشان تتجوز ..

طب سبكم من صورة الجواز دى ، ده فيه كمان اللى انقح من كده تلاقى فيه دعاره تلاقى فيه خيانات زوجيه تلاقى فيه تظبيطات عاطفيه ..وشوف المسخرة واحدة باعته أنا متجوزة جديد ومفيش خلاص توافق عاطفى بينى وبين جوزى .. طب ايه المفروض من الناس اللى بتتفرج مثلا .. ندورلها على عريس ولا نطلعها واحد منا شغال مأذون ويروح يطلقها ..

وحتلاقى برده فى الشريط اللى تايه واللى محشش واللى كاره نفسه ، وبعدين أهم حاجه باه انك تلاقى واحدة ترمى جملتين وتمشى تلاقى وراها مليون رسالة ، واحدة تقولك أنا فلانه الفلانية وتقعد توصف فى نفسها وصف يخليك تقوم من على الكرسى لو كنت قاعد ، أو تقعد لو كنت واقف
المهم وفى الاخر تطلب زوج متدين ..يا سلااااااااااام على الورع ! وبعديها بثواني يخش واحد تاني ويبدأ هو كمان يأرع فى المسألة وأنا راجل أعمال وعندى شاليه فى مارينا وكلام فى البطيخ من ده ، ويقولها انا جاهز .. والبنت متردش .. وياخد الشريط لفته … وننسى البنت وعمنا بتاع مارينا ده ..فجأة نلاقيه ظهر تاني انتى فين يا رشااااااااااااااااااااااااااااا ..

.يعنى بجد تحس ان الناس دى عالم فاضية ولا ناس عقلها ضارب متعرفش .. وبعدين يظهر لرشاااا عرسان جداد ، وتلاقى الحاج ابو خليل بتاع كفر البطيخ رجع تاني هو كمان ويبدأ يرسل قنابل الاس ام اس .. ويقعد يحمد ربنا انه خلاص هداه لبنت الحلال وان هى رشاااا دى اللى كان بيدور عليها …

بجد يا جدعان أفلام وحوارات وناس بتشتغل ناس.. وناس بتصيع على ناس .. وعلى رأى صلاح عبد الله فى مسلسل ريا وسكينة (( كله هه xهه )) ..

فأنا تحليلى الشخصي (( وأسمحولي أنى أعمل فيها محلل نفسي)) أن العالم دى عندها كبت نفسي ..يعنى واحد مراته ضرباه شبشبين ولا واحد مراته كل يوم بتنيمه مع عم فكري البواب ..يجيى باه على الشريط ويأرفنا احنا ويطلع عقدة ويقعد يلعب على بنات الناس .. لا مؤاخدة بنات ناس ايه بس ..مهو دول كمان داخلين يلعبوا ويهيسوا ، واتلم المهيس على المهيس ، والمعقد على المعقد ، واسمحولى أكرر جملة صلاح عبد الله الشهيرة (( كله هه Xهه))