إحنا الشباب بأينا  ملقف للنصابين .. وكل واحد حرامي لسه صغنون عايز يكون نفسه علشان يصبح حرامي كبير أد الدنيا لازم يبدأ حياته بالنصب على الشباب .. لإن الشباب هم الفئة المحتاجة من الشعب .. والفئة اللى لسه بتكون نفسها ومحتاجة فقط أى خرم  إبره وهى تعدي منه .. ولأن ظروف البلد زى ما إحنا عارفين فكل شاب دلوقت بيخلص كليته من هنا ويدور على أى شغلانة حتى ولو كانت الشغلانة دي خارج تخصصه ..وفيه من الشباب اللى بيشتغل وهو بيدرس فى كليته او حتى فى الثانوية العامة ..ونتيجة لتعطش الشباب للشغل ظهرت مجموعة من النصابين الجدد للضحك على الشباب .. وكلنا دلوقت اصبحنا عارفين حكاية عقود العمل المضروبة اللى بيوهم بيها النصابون الشباب .. ولأن دى خلاص باه موضه قديمة هناك طرق جديدة للنصب ولا تعرض صاحبها للمساءلة القانونية .. وهى النصب على طريقة ( بلح الحاج نادي ) .. والحاج نادي ده بأه هو شخصية كده ظهرت فى فيلم ( كراكون فى الشارع ) ونصب على عادل إمام وباع له شقه متباعة لألف واحد قبليه وإدالة كيس بلح على سبيل التبرك ،  فهوفقد الشقة لكن تبقى له كيس البلح فى الأخر .. ده الحاصل مع الشباب اليوم اللى بيشتغل طوال الشهر وفى الاخر بدل ما يقبض فلوس بيقبض كيلو رز وعلبتين سمنة ( موش بتاعة التموين اصلها إتلغت) يعنى الناس موجبين اخر حاجه مع الشباب .. وأصل الحكاية دى إنك وإنت ماشى كده فى الشارع حتلاقي ناس بتوزع إعلانات  وظائف تقرأ الأعلان اشطة الكلام ومية فل وعشرة  وفى إحدى الأعلانات اللى قرأتها بتقول ( شركة ".." تعلن عن وظائف خالية للشباب من الجنسين بمؤهل أو بدون بمرتبات تبدأ من 600 جنيه بالاضافة إلى الحوافز ..)  .

اهم حاجه إن فى الاعلان موش كاتبين أصلا إيه الشغلانه دي اللى  المفروض الناس تتقدم ليها واللي بتبدأ من 600 جنيه ومتنساش  كمان الحوافز ..من واقع بعض الحالات اللى شاهدتها أستطيع أن اقولك إن كتير من الاعلانات دى بتكون نصب لكن الشباب موش بيفكر أبدا فى الحكاية دي من هذا المنطلق لأنه ماشى بالمثل ( إيش ياخد الريح من البلاط ) ..ومن واقع ناس أعرفهم إنساقوا وراء الحاجات دي أملا فى المرتب السيمااا والقيمة أقولك خلى بالك فى بداية أى شغلانه جديدة  إنت رايح عليها ..ففى إعلان لشركة سياحية كانت عايزة ناس تشتغل وهى أصلا لا شركة ولا بتاع يعنى شقة فى عمارة من أوضتين بمنافعهم  راح واحد صديق علشان يشتغل من إعلان وقع فى ايده .. وفى الانترفيو كان عشرة على عشرة و(السى في) بتاعه فُلة فيه حاجات تسد عين الشمس .. وفى الاخر الراجل سأله سؤال غريب قاله أنت "عايز تقبض كام ؟!" ..وطبعا الواد موش عارف يرد عليه.. ده ايه الشغلانه الأشطة دي اللى فيها الموظفين بتحدد تقبض كام وبعد  هات وخد ( الواد كمان بيفاصل !!)  قاله 750 جنيه .. فرد عليه الراجل قاله ماشى استنى لما نتصل بيك .. وبالفعل اتصلوا بيه واشتغل ومرّ شهر واتنين و تلاته ولم يبقبض ولا مليم  وبعد  ما  فاض  الكيل بالموظفين من حجج الادارة من وجود أزمة قرّبت انها تُفرج خلاص ، ساب الموظفين الشركة ومخدوش ولا نكلة  لتمارس بعدها الشركة نصبها على ناس جداد بإعلانات جديدة ..

وواحد تاني راح إشتغل مندوب مبيعات عن طريق إعلان وصل له من الشارع ولكن ده كان أسعد حظا من غيره لانه عرف من رابع يوم شغل إن  الناس فى الشركة دى موش بتقبض وإن الادارة بتقبض الموظفين مرتباتهم (رز  وسمنه وسكر )  بالضبط زى الحاج نادي بتاع البلح .. وواحد ثالث إشتغل فى إحدى المطاعم فى غسيل الصحون وفى الاخر إتنصب عليه هو كمان .. فالحكاية إن النصب دلوقت شغال على ودنة وبمختلف الطرق والنصابون دول بيخترعوا كل يوم حيلة جديدة  للضحك بيها على الناس  وموش بيفكروا  ابدا فى الشباب الغلبان اللى عايز ياكلها بالحلال ..الغرض من التوبيك ده موش تخويف الناس اللى لسه مشتغلتش من الشغل بالعكس فيه شباب بيشتغل شغلانات محترمة وبيكسب منها رزقة بالحلال ولكن الغرض من التوبيك هو إحداث توعية ليس أكثر وان الناس تكون حريصة شوية وخصوصا فى الاعلانات اللى بتتوزع فى الشوارع واللى أحيانا تشم منها رائحة المبالغة فى العروض لإستدراج الشباب .. عايز تروح وتشوف وتجرب  ماشى مفيش مانع لأن التجارب حتديك خبرة ولا يلدغ المؤمن من جحر مرتين ولكن خلى بالك كن حريص ومتخليش حد يضحك عليك ويأكلك بلح الحاج نادي .

(كيـــــــمو)