تخيل معايا كده لو واحد إتجوز وفى الصباحية وجد مراته واحدة تانية .. موش واحدة تانية يعنى إتبدلت ولكن الشعر الناعم طلع باروكة ، والعين العسلية طلعت سوداء ، والبشرة البيضاء طلعت مساحيق تجميل وفى الاخر وجد إنسانة تانية قدامه ؟! ..تخيل ايه الموقف بأه.. شىء وارد يحصل ولا لأ ؟! .. أعتقد إنه وارد لأن الراجل موش بيشوف مراته على طبيعتها غير فى الصباحية وهى قايمة جمبه من على السرير وهى بتقوله ( صباحية مباركة يا حبيبي) .
هل حقيقي بأه إن البنات دلوقت خلاص "صناعي" موش " طبيعي " يعنى؟! .. وربما إنت بتسمع الاتهام ده ديما من الجيل السابق من الستات اللى تخطت  الخمسة والاربعين بشوية أو وصلت للخمسين لما تلاقي جوزها ماشى جمبها فى الشارع وعينه كده جت على حته جينز جريمي ضيق ماشية فى الشارع فتقوم علطول وكزاة  بكوعها فى صدره وهى بتقوله ( دول صناعي يا منيل إحنا جيل السمنة الفلاحي ) ..

فهل الستات بتوع زمان كانوا حامار وحلاوة وستات دلوقت حامار وعلبة بودرة ؟! .. للأسف فعلا أغلب البنات اللى موجودة دلوقت  لازم قبل ما تنزل من بيتها تقلب على وشها  علبة بودرة مع قلمين روج إلى أخر طرق (الميك أب ) اللى بتجبها حتة حتة وهنا تقرر أنها تخرج وتنزل بعد لما تكون ضيعت قدام المراية نص ساعة او ساعة إلا ربع ..وأيام الكلية كنا بنشوف بنات من دول  .. من اللى بيحطوا محل ميك أب على وشهم قبل ما يأتوا الكلية .. وكنا مثلا لو ربنا كرمنا وحضرنا محاضرة او سكشن بدري من بتوع الساعة 8 الصبح دول - اللى غالبا مش بنحضرهم أصلا-  كنا نلاقى البنات دول  وصلين للسكشن ولا كأنها عروسة فى ليلة فرحها موش طالبة جاية جامعة ..

طيب السكشن بتاع الساعة 8 الصبح ده إحنا كأولاد كنا بنصحي مثلا 7 إلا ربع علشان نحضره ده لو حد ساكن بعيد شوية عن الكلية وكنا بنطس وشنا بشوية ميه ونلبس هدومنا بسرعة  وننزل جري ومع صعوبة المواصلات نوصل 8 بالضبط .. طيب البنات بتوع (الميك أب) دول بيصحوا إمته وبيحطوا كل ده فى اد ايه وبيوصلوا قبلينا كمان !.. شفت بأه الستات جبارة اد ايه! ..هى الست لما تحط حاجه فى دماغها إنسى لازم تعملها .. بس المهم انها تحط حاجه مفيدة فى دماغها  .. يعنى فيه بنات اللى جميلة واللى مقبولة الشكل كلهم بيحطوا (ميك أب ) ولنا هنا عدة اسئلة البنات  دول بيحطوا( ميك أب)  ليه ؟! .. والغريب انهم موش عارفين ان (الميك أب) ده بيجي معاهم بأثر عكسي وتلاقى الولاد شغالين تقليس على البنات من امثلة "بص البت اللى عاملة زى عروسة المولد " وغيرها من الأشتغالات اللى الولاد الصيع الفاضيين والرايقين بيفتكسوها  لتضييع وقتهم ..

ونأتي للسؤال التاني البت بتحط الميك أب ده لمين ؟! .. يعنى دلوقت واحدة نازلة الشارع بتتزين لمين ؟! ..لو أنت مثلا سألت الستات بتوع زمان جدتك مثلا عن الحكاية دي حتقولك إن الكلام ده كان على ايامهم عيب إن البكر لا تتزين وان اللى بتتزين فقط المرأة المتزوجة .. لأن المفروض المتزوجة دي بتتزين لزوجها لكن البنت الانسة دي بتتزين لمين؟! .. أكيد بتتزين للأمة كلها!! .. وفى الأخر لما واحدة يتجرأ ويعاكس تقولك ده ( قليل الادب ) وفعلا هو قليل الادب لكن هى ليه مسدتش الباب ده من الأول ؟! .. وقبل ما تقولى ياااااااااه ده انت قديم أوي يا عم وبتقولى جدى وجدتك تعالى نتفق على حاجه مهمه .. إن الأصول والأخلاق دى حاجه مفيهاش قديم وجديد .. بل على العكس كلما تقدم الزمان كانت الاخلاق فى إنحدار ..والمشكلة اننا بنصنع من ناس نجوم وفى قرارة أنفسنا إحنا بنحتقرهم .. يعنى مثلا لما  إنت بتشوف هيفاء وهبي وروبي ونانا وماريا  وبتتمزج اوي وإنت بتتفرج عليهم ولو شفتهم فى الشارع حتجري علشان تسلم .. لكن لو قولتلك انت ايه رأيك فى أى واحدة فيهم مثلا .. أكيد حيكون رأيك كلمة قبيحة أنا مأدرش أكتبها هنا بس إنت عارفها ..

يبأه احنا عارفين فين الحق وبندلع .. يبأه البت فى الأصل تتزين فى بيتها .. موش محتاجه هى تتزين لمخاليق ربنا .. وبعدين البت جمالها الطبيعي أفضل مليون مرة من (الميك أب) اللى بيتحط ده.. وطبعا موش حكلمك عن أضراره الصحية ولا هو بيتعمل إزاي أصلا ولا من انهي مواد علشان البنات اللى بتحطه متتقرفش ..ولكن عايزين نتكلم فى نقطة أهم إن (الميك أب ) موش هو اللى حيجيب العريس ولا هو اللى حيخلى الشاب يتعلق بالبنت ..واللى نفسي تفهمه أى بنت إن الشباب لما بيتجوز موش بيدور على( ميك اب) ولا واحدة علشان يصور بيها فيديو كليب ..هو بيدور على الإنسانة المحافظة فى لبسها وفى أخلاقها ..حتى لو البنت متوسطة الجمال برضه متحطش (ميك أب ) لأن الجواز موش بالجمال .. الحب والجواز ملهوش مقاييس محددة .. وديما الانسان بفطرته بيرتاح للحاجه الطبيعية ومتصدقش إن الصناعي بيغلب ولا ان روابي غلبت السمنة الفلاحي .. الطبيعي ديما بيكسب لانه حاجه بترتاح لها العين .. والعين موش بترتاح إلا على الفطرة  وهى الحاجه الطبيعية اللى خلقها ربنا .
(كيـــمو)