أغلب الشباب بينهم وبين بعض لازم كل واحد قدام التاني يتفشخر ويتباهى بعدد البنات اللى يعرفهم .. وطبعا كلما زاد العدد ده دليل على إن الواد مجبتهوش ولادة ويستحق عن جدارة إنه ياخد لقب ( رميو الشلة ) ويتم تتويجة فى إقتراع حر مباشر تسوده الشفافية والنزاهة من بين افراد الشلة ليكون المرجعية العليا للمشاكل العاطفية بإعتبار انه واد ( خبرة ) فى التعامل مع الجنس الناعم وإحتمال يكون الواد ده بينخع على أفراد الشلة وبيكون موقفه فى غاية السوء لما واحد من افراد الشلة الشرقانين لخيال حرمة يقوله ( طب متظبطنا يا كبييييير) ..

الشاهد ان أصبح تعدد العلاقات بالنسبة للراجل مصدر للتباهى باعتباره( فتك) وإن الدنيا خلاص ادته شهادة معتمدة من قسم ( كيف تعلق وتتعامل مع الموزة) ..وهو مقتنع فى قرارة نفسه أنه موش حيتجوز ولا واحدة من اللى ماشى معاهم دول وهو بيكون صريح فى الناحية دى مع البنات إنه موش بتاع جواز .. والبنات بتكون عارفه فى الغالب ان الشاب ده موش بتاع جواز ولكن نظرا لانها مقتنعة بدهائها وبسحرها وبدلالها وعارفه أسلحتها كويس فهي داخلة العلاقة دي متحدية نفسها ولسان حالها بيقول ( حنشوف مين اللى حيكسب) وتبدأ معركة القط والفار .. الرجل يهرب والست تطارده .. وده لا ينفى ان فيه نوعيات من البنات اللى بتحب اللعب والتجربة والشهيصة ليبق فى النهاية مقولة ( كل يغنى على ليلاه ) هى الحاكمة للعلاقات السائدة من هذا النوع .

الرجل بيدخل العلاقات دي طبعا من منطلق الغرور الذكوري اللى بيتباها دائما بعدد البنات اللى عرفهم واللى مشى معاهم ومن اجل شىء تاني مهم وهو إكتساب الخبرة .. فكتير من الرجالة عندهم اعتقاد ان الراجل اللى بدون خبرة سابقة قبل الزواج فإنه حيلوص بعد الجواز وموش بعيد مراته تركبه وتدلدل رجليها .. اصل الاعتقاد ده منين محدش عارف !.. لكن حاجه كده مترسخة فى العقلية الذكورية وربما تكون المرأة هى السبب فى الاعتقاد ده بسبب الجينات الحريمية اللى ديما بتخليها بتحاول تفرض نفسها على الرجل بشتى الوسائل .. وبعيدا عن إلقاء التهم على المرأة الغلبانة وتحميلها كل غلطات وبلاوى الرجل السودة نقول إن الاعتقاد ده -بغض النظر عن سببه ايه- زاد فى نفسية الراجل مع تدني المجتمع وكثرة الشهيصة اللى بتحصل ليل ونهار وسلوك بعض البنات وملابسهم اللى موش تمام وبالتالى الرجل بيوهم نفسه انه لما يكون خبرة حيحمى نفسه من انه يقع فى براثن واحدة ترسم له الطهر والعفاف وهى كانت كيت وكيت ..

وربما السبب الاخير ده مدخل كبير جدا من مداخل الشيطان لنفسية الراجل فيحاول يوهمه ديما اننا عايشين فى وقت كله غش فى غش وانت تعرف منين الشريفة من غيرها وازاى حتتجوز وانت عديم الخبرة فى التعامل مع الستات ..ويبدأ الشيطان يشتغل بأه .. لكن السؤال هل بلاوى الشيطان دي نفعت حد ؟! ..إطلاقا .. وفيه نماذج كتيرة عدت على الانسان من الحياة من رجالة رفعوا شعار
( اديها خبرة ) إنضحك عليهم سواء بأه قبل الجواز او حتى بعد الجواز وانتهت حياتهم بالطلاق ومأسى متعددة ، حتى ولو اتجوز واحدة محترمة فمن عقوبة ربنا له حيزرع فى نفسه الشك فى سلوكياتها ويقارنها بسلوك اللى عرفهم قبل كده من منطلق التسلية واللعب.

أما نقطة ان الانسان ممكن ينخدع فى الطرف التاني علشان هو موش عنده خبره أقولك ان اصلا اللى عنده خبره ممكن ينخدع لانه فى علاقاته السابقة كان بيعتمد على عقله لكن لما يجي يحب بيتلغي من عنده العقل تماما .. لان اضعف حالات الانسان هو لما يحب .. وبالتالى حيتعامل من منطلق قلبه لا عقله وهنا حتى لو شاف حاجات خلته يشك حيجى قلبه ويكدبها وهو حينساق وراء قلبه لانه عايز يصدقه ..

أمال الانسان بأه يختار على أساس ايه ويضمن منين ان فلانه كويسه ؟! .. أقولك يا سيدى بالطرق العادية والمعتادة بالسؤال عنها وعن أهلها وفى محيط دراستها أو شغلها ..أو لو كنت تعرفها تسأل عنها كويس وتشوف التزامها وبتصلى ولا لأ وهكذا بعدين استفتى قلبك.. يعنى من الاخر تاخد بالاسباب الظاهرة أما مسألة اضمن منين دى بأه سبها على ربنا المهم انك تاخد بالاسباب لكن لا تقصر فى الاسباب وتخش عمياني وتقولى سبها على ربنا .. !!

زى واحد ملتزم ومتدين عرف واحدة قدرت انها تخدعه وتوهمه انها ملتزمة وهى كانت انسانة مستهترة ومقضياها بالطول والعرض ونظرا لانه مسألش عنها كويس ولا اصلا عرفها كويس وتغافل عن الاشياء اللى رأها منها تدل على تناقض طباعها مع ما تدعيه من التزام راح وخطبها لكن لأن ربنا أراد له الخير فبين له حقيقتها وشال الغشاوة من على عنيه .. يبأه سبها على ربنا بس خد بالاسباب .
ده باه عن الراجل صاحب الادعاء انه راجل ( خبرة ) سواء عن حقيقة أو عن مبدأ
(الصيت ولا الغنى) ..فإذا كان الراجل ديما بيحب يتباهى انه ( خبرة) فإن الست على النقيض تماما فهى تدعى انها ( خااااام ) سواء باه ده كان حقيقة ولا كذب.. فالشاهد ان كل الستات بتقول عن نفسهم انهم ( خاااام ) وان لفظ ( خبرة) لو أضيف إلى لقب واحدة ست فإنه يعنى حاجات موش تماما .. طب الراجل بأه بيحب يتجوز انهى واحدة البنت الخام ولا البنت الخبرة ؟! .. علطول اقولك فى نفس واحد (البنت الخام ) ..متلاقيش راجل أيا كانت اخلاقة يحب يتجوز واحدة خبرة لان البنت أو الست عموما فى الشرق بتمثل للرجل شرفه وعرضه وبالتالى هو عايز ديما يكون أول وأخر من يقص الشريط وعلشان كده تلاقى من الرجاله اللى عنده 28 او 30 سنة يتجوز واحدة عندها 19 او 20 سنة ويقولك أربيها على أيدي .

طيب المراة بتحب ايه باه فى الرجل إنه يكون خبرة ولاااا خام ؟!
هنا باه بتختلف من بنت لأخرى وعلى حسب ثقافتها وتربيتها .. فيه من البنات اللى تقولك انا عايزاه واد خبرة كده علشان يدلعني .. والواقع ان الستات عامة موش بتحب الراجل اللخمة و المرتبك.. هى بتحب الراجل الواثق فى نفسه الفارض لشخصيته عليها .. فالمرأة مخلوق طبيعته يُقاد لا ليقود
( حقيقة علمية حتزعل الستات) وعلشان كده تلاقى الستات اللى فارده عضلاتها على رجالتها موش بتكون مبسوطة فى قراره نفسها بل يصل الامر إلى حد انها ممكن تحتقره ..ولذلك قرأت إحدى المشاكل فى باب بريد الجمعة فى الاهرام عن سيدة عندها عقدة التسلط حتى قهرت زوجها وبأة هى الراجل وفى الأخر بتقول انها موش مبسوطة ودلوقت بتحتقر زوجها وشيفاه موش راجل ..
فالستات بشكل عام تحب ان يملأ الرجل عينها وقلبها وروحها وكل سكانتها وهنا تلاقيها علطول مطيعة له من غير اى حاجه ..ومن هذا المنطلق قد تعتقد بعض البنات انها لازم تتجوز واحد خبرة علشان يملأ عليها حياتها ويدلعها ويسعدها .. وهو برضه منطق خاطىء لان موش شرط الانسان الخبرة ده يكون قادر على إسعاد مراته لان الحياة الخاطفة اللى هو عاشها ايام الشهيصه شىء والحياة الزوجية شىء تاني ..

فالحياة الزوجية لها طبيعتها الخاصة سواء فى المشاعر والاحاسيس او حتى فى المشاكل وجايز (الخبرة) ده يفشل فى تحمل كل ده ويسيب البييت يضرب يقلب على دماغ الزوجة وموش شرط الانسان عديم التجارب السابقة انه ( لخمة ) و( مرتبك) .. لان الارتباك واللخمة من الكلام او التعامل مع الجنس الاخر ملهوش علاقة بالخبرة بقدر ماله علاقة بشخصية الانسان الاجتماعية
فالشخص عديم الخبرة موش انسان منعزل اجتماعيا فهو برضه بيتعامل مع ستات فى محيط تحركه الاجتماعي..فاللخمة والارتباك بنظرى هى مشاكل نفسية ليس لها علاقة بالخبرة .
وفيه من البنات اللى تجيب من الاخر وتقولك انا عايزاه (خام) وأنا اول ست فى حياته وقد تختلف نية المراة فى ده فإحتمال تكون عايزاه كده لتركبة وتعمله مركوب ليل ونهار وده احتمال موجود ولكنه ضعيف ويا إما لأنها عايزه تبأا حياتها مع رجل ملتزم لا يخونها بعد الزواج على اعتقاد منها يعنى ان الخام موش بيخون بعد الجواز وهى برضه قاعدة موش ثابته لان اهم حاجه الدين والاخلاق والاصل الطيب .
(كيــــــمو)