الحكماء بيقولوا إن تحرير الارض أسهل من تحرير العقل ..فلو العقل وقع أسير فكرة أو خرافة معينة فمن الصعب إن العقل يتحرر منها إلا بعد جهد كبير وده بيكون فى حالة وجود رغبة صادقة منه فى تحرير عقله ..لكن ايه اللى يخلى أى عقل يقع تحت تأثير دجل أو خرافة أو شعوذة .. هل هو الجهل ؟! ..ولاااا الخوف ؟!.. ولاااا الهروب من الواقع ؟! .. أسئلة وإستفهمات كتيرة حول موضوع أسباب وقوع العقل تحت تأثير البدع والخرافات والشعوذة خصوصا لما تعرف إنه طبقا لدراسة نشرتها( ميدل إيست أون لاين) سنة 2005م على موقعها الالكتروني أن العرب ينفقون 5 مليارات دولار على الدجل والشعوذة ..فقضية الخرافة التى يقع تحت تأثيرها العقل وإن كانت ليست خاصة بالشخصية المصرية فقط بل هى خاصة بالشخصية العربية بشكل عام ..إلا إننا سنتاولها من واقع المجمتع المصري بما فيه من خرافات وخزعبلات وكيف أثرت فى بعض الشخصيات المصرية وأصبحت تعتقد فى الدجل والشعوذة وتأخذ كلام الدجالين بصدق ويقين حتى ولو أقنعوهم إن العلبة دي فيها فيل ..!!

الخرافات فى المجتمع المصري حاجه كده عاملة زى الوباء ..ومشكلة الخرافات دي موش إنها مثلا خاصة بفئة معينة من الشعب ممكن نقول عليهم جهلة أو متوسطين التعليم ولكن الخرافات لم تترك أحد حتى وصلت إلى أساتذة الجامعات .. يعنى لما نلاقى أستاذ فى جامعة أو أى حد وصل وأخد أعلى الشهادت رايح علشان يقف قدم ضريح لاحد الاولياء وعمال يتمسح بالضريح وينادي صاحبه أعملى دي وإبعد عني دى .. لا يمكن لعقل سليم يتخيل إن واحد يروح يكلم واحد ميت ويقعد يدردش معاه ويحكيلو قصة حياته ..خد عندك مثلا عند ضريح الامام الشافعي- رحمه الله- حاطين صندوق علشان يتلقوا فيه النذور من فلوس وخلافه المهم لما بتيجي إدارة من الاوقاف علشان تفتح الصندوق وياخدوا الفلوس بيلاقوا مع الفلوس جوابات مرسلة للإمام الشافعي رحمه الله .. ومجلة الشباب نشرت صور الجوابات دي فى المجلة وهى متكوبة بخط اليد ..
ومن ضمن الجوابات دي واحد باعت جواب للإمام الشافعي بيقوله يا إمام هاتلى حقي من الحرامية اللى سرقوني وبيحكي قصته وموقع الجواب باسمه ومهنته .. ولو بصيت لمهنته موش حتلاقيها مثلا بائع متجول علشان نقول ده واحد على اد حاله ولكن كاتب مهنته إنه محاسب .. وواحدة تانية باعته جواب علشان عايزة تتجوز .. يعنى أى عقل يتخيل إن فيه ناس بتكلم ميتين والمصيبة انهم بيبعتلهم جوابات وجايز كمان يكونوا مستنيين الرد .. بجد حاجات تطير المخ .. فالشريعة الاسلامية ابدا مفيهاش الخرافات دي إطلاقا ولكن الشريعة قالت لما تزوروا القبور نلقى فقط السلام على أهل القبور .. هى كلمة واحدة تقولها ( السلام عليكم ) غير كده مفيش .. والعجيب ان الناس اللى عاملة نفسها مثقفة فى البلد محدش انتقد الوضع ده وسايبين الناس عايمين فى بحور من الخرافات والبدع ..والازهر الشريف سايب الناس دي للأسف ومطنشهم لان صناديق النذور اللى عند السيد البدوي والمرسى ابو العباس وغيرهم بتجيب سبوبه حلوة وفيه ناس منتفعة من بقاء الوضع ده على ما هو عليه ..

موش بس موضوع القبور والاضرحة دي اللى الخرافات شغالة فيها ليل و نهار .. هناك كمان الدجالين المتاجرين بعقول الناس ..وأغلب ذبائن الدجالين موش عارف ليه الستات! .. وكتير من الفنانات والممثلين بيروحوا للدجالين واتنشر فى ده كلام كتير على لسان دجالين وقعوا فى ايد الشرطة .. فالشخصية المصرية للاسف أصبحت تصدق الدجل والشعوذة .. حتى قرأت عن مجموعة من استاتذه الجامعة عاملين شقه لتحضير الارواح والضحك على السذج وإيهامهم انهم ممكن يحضروا روح دكتور فلان الفلاني علشان يعملهم عمليه لو كانوا مرضي او يحضرلهم روح موش عارف مين علشان يقولهم على سر وهكذا .. إستخفاف بالعقول لدرجة لا يمكن تخيلها .. والناس بتصدق وعايشة فى ميه البطيخ .. وموش بس عامة الناس المصيبة ان شخصيات كبيرة جدا بتصدق فى الهرتلة دي .. أنا قرأت فى كتاب ( الحكومة الخفية ) للواء / جمال حماد إن (مراكز القوة) اللى أطاح بيهم السادات كانوا بيروحوا جلسات لتحضير الارواح علشان يعرفوا السادات مدبر ليهم إيه ، ونشر فى الكتاب تحقيقات النيابة اللى كانت بتجرى معاهم واللى فيها الكلام ده .. هل من الممكن اننا نتخيل ان الناس اللى كانت بتحكمنا فى فترة من الفترات كانوا بيروحوا جلسات لتحضير الارواح .. كيف وصلت الخرافة لتقتحهم العقول للدرجة دي ؟! ..
مين السبب عن ترويج الخرافات ؟! ..فشخصية زى( أنيس منصور ) مشوشة الفكر ولا يكتب كلام له قيمة من وجهة نظرى ايه مصلحته الشخصية لما يكتب كتاب علشان يروج فيه لفكرة تحضير الارواح ويستعين بقصص لناس غربيين مجهولين ساقطي العدالة علشان يثبت صحة منطقهم!! ..هل الاثارة والدجل والخرافة باه وسيلة لانتشار كتب الناس دي؟! .. وكله على حساب عقل الناس البسطاء اللى وقعوا ضحية خرفاتهم ..وكل الحكاية فى تحضير الاراوح انهم موش بيحضروا اى ارواح ولكن بيحضروا الجن لخداع الناس فى نوع من السحر الاسود الملعون .. وكل ده والناس عايمة فى مية البطيخ ومصدقة الخرافات حتى دخلت الخرافات فى مكونات شخصياتهم بسبب الجهل وبسبب شوية مجموعة منتفعين من إستحمار الناس.

(كــــــيـــمو)