إفتح هاويس السلام النفسي وخش بصدرك بس أوعى لتاخد برد

كتبهاأكرم صبري ، في 11 فبراير 2009 الساعة: 19:55 م

أحد الفلاسفة اللى دماغهم متكلفة شوية بيقولك ايه
بيقولك إن الانسان – اى إنسان- عنده شمسان ، شمس بتشرق عليه كل يوم الصبح وشمس تانية بتشرق جواه ، تصدقوا بجد الفيسوف ده عنده حق ،
ان كل واحد فينا عنده شمس داخليه جوه نفسه ، يعنى حاجه كده جوه نفسه تخليه يشوف الدنيا ربيع والجو بديع فى اسود ,احلك اللحظات، والاهم من ده كله إنها بتخليه قادر على الاستمرار فى الحياة

وخلينى اقولكم إنى شفت إنسان عنده أكتر من 70 سنة وينزل الصبح بدري علشان يفتح الدكان ( المحل) بتاعه بكل همه ونشاط وهو مبسوط رغم انه موش محتاج للدخل اللى حيجبهوله المحل ، ولما قولتله انه ليه بيتعب نفسه وانه فى سن دلوقت محتاج فيها انه يتمتع بالحياة بدون اى هموم ، قاللى انه موش بيشتغل علشان محتاج فلوس لكن هو بيشتغل علشان يحس انه لسه عايش وإنه هو موش حاسس ان دوره فى الحياة انتهى .

هو ده يا جماعة اللى أنا بتكلم عليه شمس الانسان الداخلية اللى ديما محسساه ان فيه يوم جديد بإنتظاره ، وده هو سبب انطلاق الانسان مبدعا فى الحياة ، وانا اعتقد ان لو إنسان فقد شمسه الداخليه دي موش حيبأه فيه حافز ان الانسان يشتغل او يجتهد او انه يعمل اى حاجه .

بالعكس ممكن يفقد الرغبة كمان فى الحياة ، يعنى لما إستيقظ العالم كله على انتحار ( مارلين مونرو ) عجز العالم كله عن إيجاد سبب لانتحار الممثلة الموزة دي ، فهى كانت تمتلك المال والجمال والشهرة ، و(فان جوخ) الرسام العالمي الهولندي الشهير انتهت حياته فى احدى المصحات النفسية وبعدها اطلق على نفسه الرصاص وخلع ..طب العالم دى إنتحرت ليه ..كان عندها كل حاجه فلوس وشهرة ..

أنا أعتقد ان العالم دي مكنش عندها الشمس الداخلية اللى حتحسسهم ان حياتهم لها قيمة ، أو إن لسه الحياة محتاجه لهم ، وخصوصا الشخصيات البعيدة عن ربنا – سبحانه وتعالى – يعنى ليه مثلا عندنا حالات الانتحار موش زى اوروبا ، لان الوازع الديني موجود عندنا ، الوازع الدينى ده هو اللى بيمثل لنا الشمس الداخلية اللى بتخلى الانسان يحتسب كل شىء عند ربنا طمعا فى رضاه ، يله إفتح هويس السلام النفسي بداخلك وإفتح شبابيك قلبك خلى نور شمسك الداخلية تدخل تنور كل جسمك بس خلى بالك أحسن تاخد برد

( كـيمو)

أضف الى مفضلتك

ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج | دوّن الإدراج

سوما حسونه قال:
فبراير 11th, 2009 at 11 فبراير 2009 7:59 م

كيمو

الاولـــــــــــــى

هاقرأ و

ارجع

تحياتى

سوما حسونه قال:
فبراير 11th, 2009 at 11 فبراير 2009 8:09 م

كيمو المبدع

موضوع ليه ابعاد حلوة اوى

وعميقه ف المعنى والاحساس كمان

كونك وصفت الامل فى بكره بشمس تشرق داخل كل انسان فده هايل جدا
بس مش كلهم زى ماانت قلت بدليل ان فيه ناس بتنتحر ف الغرب زى ماقولت لانهم مش متدينين عندهم المال والجمال وكل شىء لكن الايمان جواهم مفقود

لكن عندنا احنا الايمان ده بيدينا قوة فظيعه والحمد لله تخلى العجوز اللى عنده سبعين سنه ينزل ويحس كانه شاب عنده تلاتين سنه

بتبقى فعلا شمس وطاقه تفاؤل وامل جباره جدا ودى مش بتنشأ من فراغ لازم يبقى الانسان من جواه عايزاها عشان تحصل

موضوع عميق اوى اوى اوى يا مبدع

انت انجزت واوجزت فعلا

تحياتى لك وليدك التى تحمل دائما قلم ذهبى

أكرم صبري قال:
فبراير 11th, 2009 at 11 فبراير 2009 8:26 م

سوما حسونة ..
مبدعة مكتوب صاحبة الكلمات الرقيقة
وكلاكيت تاني مرة وعودة جديدة مع إستايل جديد من مكتوب
والله يا سوما لازم الانسان عامة تكون عنده شمس جواه وخصوصا فى الايام اللى احنا عايشين فيها دي ..يعنى انا شايف ان طول ما ظروف المجتمع تبأه صعبة لازم تزيد معاها الشمس الداخلية دي جوه كل واحد مننا وإلا بأه نكتئب كلنا وتقف الحياة ونقضيها حل الكلمات المتقاطعة فى جريدة الجمهورية .

فيه حاجات كتير محتاجة تتغير فينا علشان المجتمع كله يتغير ، فيه حاجات خارجه عن إرادتنا دى موش حنعرف نعملها حاجه او نغيرها ،لكن لو صلحنا اللى فى ايدينا فإحنا بنغير ما بأنفسنا ، فبلاشك ربنا - سبحانه وتعالى- حيغير ما بالمجتمع كله ..

إحنا محتاجين يا سوما يكون عندنا تفائل وامل من جوه .. موش كلام خيالى ولا نظرى .. أصل لما نطفى النور جوانا طب واخرتها ايه ؟! .. هل ده حل لمشاكلنا؟! .. إطلاقا .. عايزين نتخطي باه مرحلة الاحباط موش بالكلام لكن بالفعل .

منورة ديما (( جمالات)) يا سوما
بتعليقاتك اللى ديما فى الجون ولااا محمد ابو تريكة ..
الله عليك يا حبيب والديك .

هيثم ابوخليل قال:
فبراير 12th, 2009 at 12 فبراير 2009 8:35 ص

أول حكم من محكمة عسكرية علي مدون مصري

قضت يوم الثلاثاءالموافق 10 فبراير ماتسمي بالمحكمة العسكرية بالإسماعيلية بحبس كل من أحمد سعد أبو دومة وأحمد كمال عبد العال سنة مع الشغل وغرامة 2000 جنيه، بزعم التسلل عبر الحدود الشرقية بطريق غير شرعى، بزعم مخالفة القرار الجمهورى 298 لسنة 1995.وكانت النيابة قد أحالت أحمد سعد دومة إلى المحكمة العسكرية رقم 34 لسنة 2009 جنح عسكرية شمال سيناء، وبعد سماع المحكمة للمرافعات قررت حجز الدعوى للحكم بتاريخ اليوم

الجدير بالذكر أن المدون أحمد دومة هو صاحب مدونة علي مدونات مكتوب وهي مدونة شاعر إخوان علي الرابط :
http://ikhwan-poet.maktoobblog.com/

أظهروا دعمكم ومطالبتكم بالإفراج الفوري عن دومة

فالذهاب لغزة ليس جريمة يحاكم عليها شاب في 22 من عمره بسنة سجن ..!!!

شُمُوْخَ الجَرّحْ قال:
فبراير 13th, 2009 at 13 فبراير 2009 2:47 ص

حلوووو
جدا جميل الوصف ..
دائما نحتاج لـ شمسنا الداخلية حتى نستطيع الحياة بأريحية ..

دمت بخير

شموخـ

عادل حجازى قال:
فبراير 14th, 2009 at 14 فبراير 2009 1:29 م

حلوة حكاية شمس الانسان الداخلية دى !

بس انا اعتقد ان الادق هى ما يسميه علماء النفس رغبة الانسان فى الحياة !!

اللى هى زى ما وصفتها بحالة العجوز بتاعت المحل .

هو حاسس انه ليه دور …رغبته فى الدنيا موجودة

لكن

اكيد عدى عليك اللى بيموت بعد وفاة زوجته باسبوع واحد من الحسرة - مجنون طبعا !!- أو …اللى بيموت بعد وفاة صاحبه ..حصلت والله مع ناس اعرفهم …دول …الحياة عنده عبارة عن شخص ..او…اهم حاجة فيها على الاطلاق هو الشخص دة …حياته مرتبطة بيه

نوع من عدم الرغبة الكاملة فى الحياة قد يؤدى بالشخص بالفعل الى الوفاة

بهبوط مفاجىء فى الدورة الدموية

سكتة دماغية

عافانا الله جميعا

وبالمناسبة

مارلين مونرو ما انتحرتش ..دى قتلوها يا كبير وقالوا عليها انتحرت …زى المشير عامر كدة !!!!

شكلك مش مذاكر !!

تحياتى يا جميل

dina seliman قال:
فبراير 14th, 2009 at 14 فبراير 2009 6:42 م

اكرم باشاااا
كلامك مظبوط من ناحيه الشمس الداخليه ويكون عندنا امل
اعمل لدنياك كأنك تعيش ابدا

بس فى ملحوظه صغننه كده
فان جوخ لما انتحر مكنش لاقى ياكل
ومديون وحس انه بقه حمل على اخوه
من كتر الديون اللى عليه
فان جوخ مابقاش يجيب ملايين الا بعد ما مات

أكرم صبري قال:
فبراير 15th, 2009 at 15 فبراير 2009 6:26 م

عادل حجازى ..
قتل المشير عبد الحكيم أو الموزة مارلين دى مجرد اجتهادات يا عم عادل لا يقم عليها الدليل
انا بتكلم بس من الجانب الرسمي المعلن .
أما عن أرتباط حياة انسان بحياة حد تاني سواء زوجته او صديقة ليه لأ ؟! .. موجودة وشفناها فى الحياة .
تحياتي لك يا عم عادل على زيارتك اللى زى العسل .

أكرم صبري قال:
فبراير 15th, 2009 at 15 فبراير 2009 6:28 م

دينا ..
أشكرك فعلا على التعديل ده ولعلني نسيت الحالة الهباب اللى كان عايشها فان جوخ لكن ممكن نعدل ده ونستعين بدل منه بمثال تاني
زى المغنية داليدا .. او الممثل الشهير جورج ساندروز واللى حصل على الاوسكار وغيرهم من أصحاب الشهرة والمال اللى كانت نهايتهم بإيديهم .

شكرا يا دينا على مرورك .

posycat قال:
فبراير 18th, 2009 at 18 فبراير 2009 9:36 م

كيمو كلام جميل جدا
أنطلق من قلمك الي عقلي وقلبي
فالامل هو الحياه
وعلينا أن ننهض لنبني جسور الامل فوق بحور الياس

أحيك

سامية فريد قال:
فبراير 19th, 2009 at 19 فبراير 2009 1:01 ص

أكرم
عندك حق لازم يكون جوانا طاقة أو شمس أو رغبة مش مهم ايه المسمى المهم المعني
وعاوزة اقولك حاجة بفتخر بيها
والدى الله يرحمه فضل يشتغل لاخر يوم حتى وهو على فراش المرض في المستشفى كان بيتخانق معانا علشان نجيبله شغل مكتبه وكان عمره 78 سنة وكل الي يشوفه ويشوف نشاطه وحيويته مايدلوش سنه لانه كانت جواه الشمس دى بتديله
حرارة وطاقة

ادراجك ده فكرني بوالدى الله يرحمه واد ايه كانت جواه شمس قوية اوي

شكرا اكرم بجد ادراج جامد

سوما حسونه قال:
فبراير 23rd, 2009 at 23 فبراير 2009 1:28 م

فينك ؟؟؟

يا صاحب الشمس الداخليه ؟؟؟؟

HARD TIMES قال:
فبراير 26th, 2009 at 26 فبراير 2009 7:25 ص

السلام عليكم ورحمة الله وبركاته
الاخ العزيز كيمو
كيف الحال
وحشاني قهوتك جداً
والواحد محتاج شوب قهوة مظبوط لحسن خلاص
الحياة مش مظبطه خالص ههههههههههههههه
اتمني أن تكون بخير
وإن شاء الله سأتواجد معكم بأذن الله دائماَ
أتيت للتحية والسلام ولي مشاركة أخري بالمتابعة
أشوفك ع خير