السلطانية لا تزال على رأسي

الواحد مننا لما يحب يعمل فيها فهلوي وبيفهمها وهى طايرة وان مفيش حد بيشتغله يحب يبين إن اللى  قدامه معرفش يضحك عليه يقوله ساخرا ( لبسنى السلطانية ياض ) ..مع أن الحكاية كلها مش مستاهلة يعنى ...لأننا كلنا لابسين السلطانية ومبسوطين ..أصل لبس السلطانية فى حد ذاته حاجه تفرح ... ده حتى زمان كان فيه مسلسل إذاعي  بيتكلم عن فوائد السلطنة وان لبسك السلطانية ده شىء فى حد ذاته خيالى .. لدرجة ان مرزوق الصياد بطل المسلسل الإذاعي لما كانت موجه تشيله وموجه تهبده حتى وصل لبحر الظلمات ونزل على جزيرة عليها ناس( سلط ملط) يعنى يا مولاى كما خلقتنى مسكووووووه وكانوا عاوزين يقتلوه  وقالوا له هااااااا يا معلم انت عدو ولا حبيب .. قالهم طبعا حبيب .. قالوا له طب فين الهدية بتاعة الملك بتاعنا ..عاوزين ينفضوا جيوب الراجل اللى هى اصلا خاوية .. الراجل معهوش حاجه... يقوم بكل خفه ودلع يِطلّع ( سلطانية ) حلوة كده ويقولهم دى هدية الملك بتاعكم .. وياخدها الملك بتاعهم ويلبسها على رأسه ويبأه مبسوط أوى وشايفها شيك عليه ولا اجدعها سلطانية من الشانزليزيه ..
 
اهو احنا باه عاملين زى الملك ده لابسين السلطانية ومبسوطين وبنغنى لها كمان ( يا سطانية الهنا يا رتنى كنت أنا ) ونعمل لها فيلم ( السطانية لا تزال على رأسى ) وأنا عندي فكرة السيناريو مجموعة من الناس لابسين السلطانية وفجأة طلع فيهم واحد وقلع السطانية وقال كفاية سلطنة .. الناس حيعملوه كمجرم حرب وانه خارج عن النظام العام للسلطنة لغاية ما يعملوله غسيل مخ مع شوية لعب فى الدماغ وترجع ريما لعادتها القديمة وفى أخر الفيلم يلبس السلطانية مرة تانية والجموع الغفيرة تخده بالحضن ويشيلوه على أكتفهم هلاااااااا هوووووب وهم يرددون شعار ( السطانية لا تزال على رأسى ) وتنزل كلمة النهاية .. إيه رايك مش قصة حلوة وممتعة نرصد من خلالها واقع السلطنة الطحن اللى منسجمين معاه اخر انسجام ..والغريب ان كتير مننا عارفين انهم لابسين السلطانية لكن محدش حتى بيحاول يرفع ايده ويرميها من على راسه .. لكن دائما نكتفى بالبرطمة حتى تحول كل واحد مننا إلى برطمان من العيار التقيل ..رغم انك ممكن ترفض السلطانية فى حاجات صغيرة وفى ايدك لكن تعمل ايه بأه اللى فيه داء ميبطلوش ويموت المتسلطن والسلطانية على راسه ..

واخر سلطانية لبسها الطلبة الغلابة بتوع الثانوية العامة ..شغل حلبوحة على كبير .. وكمان مش يِلَبِسوا العيال السطانية بحنيه شوية ..أبدا .. يعنى أنا يا جماعة مش متخيل ازاى طالب يقعد يذاكر من شهر اغسطس 2007 ويمتحن فى يونيو 2008 علشان يدخل الامتحان يلاقى واضع الاسئلة مطلع له لسانه ويقول له ضحكت عليك الاسئلة من خارج المقرر .. أو اسئلة معقدة محتاجه أينشتين علشان يحلها .. وهم ضربوا طلاب الثانوية العامة فى المرحلة الاولى فى التفاضل .. وفى المرحلة الثانية فى الديناميكا.. مهو لازم يلبسوا السطانية للعيال فى مادة او اتنين علشان تعمل فرق فى المجموع .. مش مهم عندهم بأه مجهود الطلاب ومش مهم أعصاب اولياء الامور اللى كانوا بيوفروا من لقمتهم طول السنة علشان الدروس ومش مهم حرقة الدم  المهم عندهم انهم يتصرفوا فى اعداد الطلبة الكتيرة دى اللى مش حيلاقوا لهم مكان واللى اغلبهم كان حلمه كليات قمة .. ده كوم وتسريب الامتحان كوم تاني .. يعنى أى عيل من بتوع الديسكوهات واللى بيتسرمح طول السنة  ومعاه قرشين يشترى بهم الامتحان  وخلصت القضية .. دى سلطانية معتبره اخدها كل طالب جاد وملتزم ...بعدين اصلا يا اخوانا التعليم كله من اوله لاخر سلطانية فى سلطانية وملهبية على ملوخية ده أنا ايام الكلية كنا بناخد تدريب على بعض الاجهزة بعدين ببص لجهاز من الاجهزة لاقيته بيطلع فى الروح ومش مدى نفس ، فنديت على المعيد وقولتله يا باشمهندس الجهاز مش شغال  قاللى الاجهزة دى للعرض بس ، قولتله للعرض بس ازاى ، قاللى لما تشتغل بره فى سوق العمل مفيش الاجهزة دى خالص دى خلاص انتهت من ربع قرن ..أمال احنا كنا بنتعلم ايه!!  ده على أساس خد فكرة واشترى بكره ..سلطانية التعليم سلطانية واسعة جدا عاوزه مجلدات نتكلم فيها ...

فيه سلطانية معتبرة تاخدها مثلا فى أوتوبيس مكيف مكتوب عليه الاجرة 3 جنيه .. تدخل الاتوبيس ده وتدفع زى الشاطر الــ 3 جنيه بعدين لا تلاقى تكييف ولا بتاع ولا كلام نعناع .. اصل الحكاية ان فى الصيف بيفتحوا زجاج الاتوبيس وفى الشتاء بيقفلوه كده بأه مكيف ..شفت ازاى تفانين معتبرة ..والادهى باه إننا بينا وبين بعضنا – نحن المتسلطنين- بنحاول نستكرد بعضنا ونلبس بعضنا سلطانية دوبل مرة كانت فيه واحدة ست واقفة على محطة القطار وكانت بتكلم صاحبتها بصوت واصل للى واقف قريب منها- اللى هو أنا- بس مكنتش واخدة بالها مني.. وبتقول الرجاله دول أسوأ شىء فى الدنيا ولازم ينقرضوا .. المهم القطار وصل للمحطة وكل الركاب اللى على المحطة هاتك يا جرى علشان كل واحد يلحق كرسى .. واخيرا لحقت كرسى معتبر وايه كمان يا باشا جمب الشباك عدل .. المهم بعد شوية لاقيت الست دى جاية تكلمنى بكل ذوق وحنيه (( من فضلك ممكن تقعدني مكانك لانى مش قادرة اقف )) طبعا برستيجى كراجل لا يسمح ان اقعد وواحدة ست واقفة وطلبت منى انها تقعد لكن وانا بقوم بقولها ايه (( لو الرجاله انقرضوا بأه حتعملوا ايه )) فابتسمت وهى بتقول (( واحنا برده نستغنى)) .. فقولت داخل نفسى (( لبسينى السلطانية ياختى )) .
(( كيــــمو ))