يا مركبي سيرى فى طريقك ولا تخافى الرياح لو فيه ضلام فى الوجود قلبي أنا ملاح

فى فيلم ( كلمة شرف) بتاع وحش الشاشة فريد شوقى .. ولما كان مسجون وبيكلم رئيس السجن اللى هو كان ( أحمد مظهر) بعد فشل محاولته للهرب خارج أسوار السجن ، قاله ( دى مش اول مرة أحاول فيها الهرب ومش حتكون أخر مرة ) .. تقريبا ده هو نفس الكلام اللى قاله أحد الناجين من الغرق من بتوع الهجرة غير الشرعية  واللى كانوا حيغرقوا على شواطىء إيطاليا .. ورغم أن واحد من الناجين دول سبق له قبل كده انه سافر برده هجرة غير شرعية وكان حيغرق وانقذوه  وحاول لتاني مرة وتكرر نفس  السيناريو .. إلا أنه مصمصم إنه يصل لشواطىء  إيطاليا أو الموت دونها .. وبيقول دى مش اول مرة ومش حتكون اخر مرة .. إيه الاصرار ده اللى ممكن يخلى إنسان يجاذف بحياته ..يعنى انت لو عاوز الدقه ايه الرغبة فى الانتحار دي .. حتى انه وضع الحياة فى ايطاليا فى كفه والموت فى كفه تانية .. مين اللى وصل الناس للحالة الهباب دي ..الحالة اللى خلتهم يهجروا بلادهم حتى لو كانت فى الهجرة دي موتهم .. مين المسئول عن الوضع ده ..

هو ده السؤال اللى إستطاعت ( قهوة جملات) وفى انفراد ساحق فى عالم التدوين أن تحصل على اجابته من مجموعة من النخبة الفكرية فى عالم العربي .
فى البداية سألنا ( سعيد كوباية ) الخبير فى شئون شحن البنى أدمين وتفريغهم .. فقال : (( الحقيقة يا جماعة إن إسرئيل هى السبب ، هى اللى غرقت المراكب بتوع العيال دول على شواطىء ايطاليا علشان تهيج الرأى العام العربي ضد حكوماتهم )) ولما حاولنا نستفهم من عم ( كوباية ) عن مين تحديدا فى إسرائيل وراء حكاية غرق المراكب دى قال بكل حماس (( بن جوريون )) .

أما استاذ ( عوض نظرية ) المسئول الرفيع عن وضع الخطط والنظريات لشئون الهجرة فقال بكل صراحة : (( المسالة محتاجه نظرية والعيال دول سافروا من غير نظرية محددة يمشوا عليها علشان كده النظرية بتقول ان من يمشى بدون نظرية لازم تكون نهايته فى المهلبية ))
أما رجل الاعمال الشهير ( أبو الهدد ) بتاع فيلم ( الراقصة والطبال ) قال ردا عن سؤالنا : (( شعارنا من هد وجد ، شوف يا أستاذ لازم تهد علشان تبنى ، والبلد مليانة شباب خليها تخف  وده رزق السمك اللى فى البحر ، شغل دماغك أمال ))
ومن حسن الحظ اننا وجدنا عند ابو الهدد الست ( زكية سوسته ) الرقاصه اللى اعلنت إستيائها بكل صراحة من اللى بيحصل وقالت (( شوف يا دلعدي اللى بيحصل ده ميرضيش حد ، يعنى هما الستات بتوع إيطاليا دول بيعرفوا يرقصوا أحسن مننا ، كده الشباب بتوعنا ينحرف ، على الاقل احنا بنرقص بترخيص )) ..

بعد كده نزلت ( قهوة جمالات) إلى الشارع علشان تستطلع رأى عامة الشعب فى اللى بيحصل ولكن للأسف الشديد فشلت جميع المحاولات فى اخذ كلمة من المواطنين أو محاولة إستطلاع رايهم .. فــ ( زكى زُمارة) صرخ فينا لما حاولنا إننا نسألة وقال: ( ناس معندهاش دم ده وقت أسئلة وهباب مش شايفنى متلقح فى طابور العيش بقالى ساعة ) .. حاولنا أننا نطلع من طابور العيش بعد جهد جهيد لنجد رجل فى أوائل الثلاثينات قاعد على الرصيف قدام الفرن وعينه شاردة ومش مركزة فى حاجه معينه .. اقتربنا منه فى حذر وفى توتر سألناه (( إحم إحم .. احنا بنعمل تحقيق على الشباب الغارق على شواطىء ايطاليا بتوع الهجرة غير الشرعية .. تفتكر ايه السبب فى هجرة الشباب دول  وايه الحل اللى تقترحه )) .. لم يرفع الرجل نظره لي وظل شارد النظرات وهو يهمهم فى شىء أقرب للهمس أغنية العندليب ((يا مركبي سيرى فى طريقك ولا تخافى الرياح لو فيه ضلام فى الوجود قلبي أنا ملاح))
ثم رزع دمعتين .

((كيــــــمو))