الحوار الصريح بين مستكة والدكتورة نفوسة النفساوية

صباح المكاشفات اللى هى
بصراحة ومن غير خجل مع الدكتورة
(( نفوسة النفساوية))
أستاذة علم النفس بجامعة نداغ اللبان فرع شكلس

بسسسسسسسسسس سكوت
كلاكيت تاني مرة
مشهد داخلى
(( مستكة ممدة على الشيزلونج - نفوسة قاعدة قدمها وبتعدل فى نضارتها كعب الكوباية ومشغله الكاسيت علشان تسجل ..وينتشر فى المكان موسيقى عمر خيرت الهادئة))

نفوسة النفساوية :  مستكة .. فضفضى ورطرطى الكلام اللى عندك من غير حبشتكنات ؟!

مستكة : بدأت العلاقة اللي بينّا تاخد شكل تاني.. أخدت رقم التليفون منه وبقيت باتصل بيه بصفة دايمة. كان بيبقى مشغول في أحيان كتير في الكلية، وبالتالي كنت باتصل أنا.. يعني ماكنتش باعمل فرق..

نفوسة النفساوية : وبعدين يا دلعدي ؟!

مستكة : دلوقت بقالنا 5 شهور.. بس فيه مشكلة.. ساعات كتير باحس إنه زهقان مني، وبيبعد عني باستمرار.. بيتحجج بأي حاجة عشان ينهي ميعادنا بدري ومش بيحب يقضي وقته معايا زي الأول.. باتقتل بجد لما باحس إنه مش متحمس لي.. أو مش بيحبني قد ما أنا باحبه.. مش عارفة إيه اللي حصل!

نفوسة النفساوية : يا ترى ايه سبب البرود فى علاقتكم دى ؟!!
مستكة : يا دكتور امال انا جيالك ليه !

نفوسة النفساوية :  لازم يكون فيه مشاركة وتفاعل .. طب شوفى يا مستكتى  لما بتتصلي كتير كده أو بتحاولي التواجد في حياته أكتر من اللازم، بيحس إنك مستعجلة على الارتباط، والارتباط في حد ذاته مش موضوع سهل.. لأنه حاجة بتستمر العمر كله بإذن الله فبيخاف إنه يتقدم. بيحس إنك حاسة إنك لازم ترتبطي بيه.. للأبد.. للأبد.. للأبــــد (وده شيء مخيف زي ما إنت واخدة بالك!).

مستكة :  تصدقي لقيت نفسي إذ فجأة كده باقول له تعالَ نشرب حاجة في الكافتيريا؟؟
نفوسة النفساوية :  والمشاريب على مين .. احم احم .. قصدى وبعدين ؟؟
مستكة : أصل إنت عارفة هو خجول قد إيه.. لما شفته بيبتسم لي من بعيد، قلت لنفسي أكيد عاوز يصارحني باللي في قلبه..

نفوسة النفساوية : اممممممممممممممم الكلام ده يا مستكة مش بيأكل عيش ده اساسا لو عرفتى تجيبيه وربنا نتعك بالسلامة وعرفتى توصلى لشباك الفرن .. الحقيقة يا عزيزتي إن معظم الرجالة –وده مش كلامي ده كلام علم النفس- مش بيكونوا خجولين قوي زي ما إنت فاكرة، وإن الراجل لو فعلا فعلا مهتم بيكِ وعاوز يرتبط بيكِ هيستجمع كل الشجاعة اللي عنده وهيفاتحك في الموضوع.

مستكة : عارفة إن الانتظار للـنص التاني صعب، خصوصا في الظروف الاقتصادية الجميلة اللي احنا عايشين فيها ومنحنى الأخلاق اللي في نزول مستمر..
طب حقولك حاجه .. هو لما كان فى بداية علاقتنا بيبصلى انا كنت ببصله .. دلوقت لما ببصله بيعمل انه بيقرأ فى جرنال المصري اليوم ومش مدينى اهتمام .
نفوسة النفساوية : اممممممممم معلش اصل البلد حالها مش تمام اضرابات على غلاءات على بلاوى سودة تلاقيه بيتابع .. اه اكيد بيتابع.
مستكة : لالا يا دكتورة ..اهىء اهىء اهىء .. ده مبأش يحبنى .. بيتهرب مني ..هو انا كنت غلطانة لما تجاوبت معاه لما كان بيبصلى ؟

نفوسة النفساوية : اممممممم .. بيتهيئلى كده يا مستكتى ..اصل التصرف السليم إن البنت تريح نفسها. ولا تحمل نفسها هم إنها تتابعه بعينيها، ولا إنها أول ما تحس إنه بيبص لها تبادله النظرات واللهفة. والسبب إن تلك الطريقة تجعله يفقد اهتمامه بكِ
مستكة : لا أزاى يا دكتورة ..ده فى اول علاقتنا كنا بنبص لبعض كتييييييييروكان مهتم.. لغاية ما اقعدنا نتكلم مع بعض وكان جنتل مان معايا على  الأخر ..حسيت انى عاوزه اتكلم معاه فى كل حاجه ..بأيت بتكلم وهو بيسمع .. لغاية ما ريقى نشف

نفوسة النفساوية: ودى غلطة تانية
مستكة : ازاى
نفوسة النفساوية : المفروض إن البنت في أول لقاء أو كلام بينهم تكون هادئة جداً ولو بتموت فيه.. وكما إنها هتمسك لسانها لازم أيضاً تمسك عينيها.. يعني بلاش أو -بصراحة أكثر- عيب إنها تسهّم فيه وتسبّل. لأنه هياخد باله من نفسه أكثر من اللازم وهيحس إنك محاصراه وضيقتِ عليه الخناق باهتمامك. وبالتالي، يعمل حاجة من اثنين إما إنه هيزهق وهيمل منك أو يخاف ويكش منك بسبب جراءتك.. وفي كلا الحالتين سيهرب.

مستكة : أمال أعمل إيه، كنت أتكلم في السياسة والفن والحياة العامة؟
نفوسة النفساوية : لأ.. ببساطة افتحي له الطريق وسيبيه يتكلم.. وفتح الطريق هيوصل له لما يلاقيكِ مهتمة بمن حولك ومركزة في لا شيء.. يعني عينك مش جوه عينه.. لأ.. وزعي نظراتك على كل المكان.. حتى لو ماكانش فيه ناس كتير، اتفرجي على الحيطان، بصي لتحت ووزعي نظراتك على اللي حواليه في الهوا.

مستكة : كده حيقول عليا مجنونة !!!!!
نفوسة النفساوية : وهو المطلوب .. هو اصلا فيه حد عاقل بيحب الايام دى
مستكة : طب هو ضاربها طناش دلوقت .. اعمل ايه ؟
نفوسة النفساوية : اديها طناش انتى كمان الأول والآخر العملية كلها نصيب.. آه صحيح كل واحد بيحاول بس لحد معين وبعد كده ستوب.. وزي ما قالت جداتنا زمان.. نصيبك هيصيبك مهما كنت فين.. ده النصيب غلاب.. يا ولد هات العطر .. قصدى يااااااااااااااااااااااافرج دخل اللى بعده

(( كيـــمو))