رغم ان زيتهم بأه خلاص فى دقيقهم لكن اطمئن فلن نتلولو ولن نتلحلح ولن نتبحبح!!

على طريقة إمتحانات الثانوية العامية أقصد العامة أطرح عليكم سؤال للمتفوقين .. والسؤال هو هل هناك علاقة بين الإقتصاد والأخلاق ؟! ..أو بين السياسة والأخلاق ؟! ..طب تعالى نخلط كله ببعض ونعمل شاى بلبن ونقول إقتصاد فى السياسة أو سياسة فى إقتصاد هل لهم علاقة بالاخلاق !!

( نورينا هيرتس) هتجاوب على السؤال ده .. و( نورينا) مش إسم ممثلة من اللى بياخدوا 2 مليون فى 30 حلقة من مسلسل هابط وملل .. ولا هى دكتور فى جامعة بتدي رسائل من ماركة ((حتى)) .. ( نورينا) واخده دكتوراه من جامعة (( كمبردج)) فى الاقتصاد ..يعنى الست عارفه هى بتقول ايه وبتتكلم فى تخصصها لا هى أفتت فى الدين ولا رفعت شعار ( كله ماشى ) زى ما بتوع (( حتى)) بيعملوا دلوقت .. الست دى عملت الشاى بلبن اللى بقولكم عليه وخلطت الاقتصاد فى السياسة ، وبصت للكوباية من بعيد وبعدين حطت عليها علامة إستفهام بتقول إيه هو المبرر الاخلاقى للرأسمالية علشان تبهدل المواطن وتطلع عين اللى خلفوه وتبيعه فى سوق الكانتو بتلاتة تعريفة ؟ .. وعلى مدار (282)صفحة من كتابها ( السيطرة الصامتة) بتحاول تجاوب على السؤال ده .

الشىء المهم فى العملية دي أن ( نورينا ) فى كتابها مش بتمسح بوخ لاحد .. ولا بتقول كله تمام .. ولا بتقول إن المواطن هو اللى حمار ومش فاهم الدنيا ماشية ازاى .. لكن ( نورينا) ومع اول صفحات الكتاب بتقول بالفم الحياني (( يا جدعان الكتاب ده نصير للشعب ونصير للديمقراطية )) ..وحاولت أن تبين العلاقة بين السياسة والاقتصاد ووضحت ان الاقتصاد هو اللى بيتحكم فى السياسة .. والست نورينا – الله يسترها- بتوضح أن ممثليهم فى الانتخابات بيركعوا لرجال المال ومش بعيد كمان يرقصوا لهم عشرة بلدي .. ولفظ الرقص ده ذكرته ( نورينا) على فكرة .. وبتوضح الست ( نورينا) أن رجال المال مش بيدوا الفلوس دى كده لله وللوطن .. لكن شىء مقابل شىء .. وسياسة ( شيلني واشيلك) .. فمثلا كلينتون شال الضريبة من على البيرة مقابل تدعيم بعض برامجه بالمال .. يعنى الشعب يتكيف وتجار البيرة يكسبوا وكلينتون يمشى حاله .. وكمان شوف دى يا معلم علشان تتعلم .. أمريكا وست ابوها بريطانيا عملوا زمان نظام هباب اسمه ( إيشلون) علشان يتجسسوا به على المانيا النازية .. وكان شغال كفاءة .. لكن بعد لما سقطت النازية فنظام ( إيشلون ) كده حيتجسس على مين ! مش معقول يخراطوه للوز !

قالوا خلاص نشتغل فى الازرق .. وقلبوها شغل بلطجة .. وسلطوا (إيشلون) على الشركات الرأسمالية الكبرى وسرقوا منهم الصفقات التجارية لحساب الشركات الامريكية .. ومن غير دخول فى أرقام كتير من اللى صدعت ( نورينا) بها دماغنا أقولك إن (إيشلون) الهباب ده تسبب للتجارة الالمانية فى خسائر وصلت لــ 10 بلايين دولار فى عام 2000م .. فلك أنك تتصور الكوارث اللى عملها ( إيشلون ) .. وإذا كان الهباب إيشلون ده بيخبط فى شركات غيلان برده وحيتان كبيرة من حيتان السوق  فالعملية كلها مش مهمة لنا .. بس فى الاخر كله على دماغ المواطن .. لانه فى نظام مهبب زى ده الاغنياء بيطلعوا لفوق والفقراء نازلين لتحت لغاية ما حيخرموا باطن الارض من النزول .

وزى ما انت شايف كده فى نظام عالمي زى ده بتتحكم فيه الشركات الراسمالية كان لازم على رجال السياسة انهم يحطوا ايدهم فى ايد الغيلان دول .. والعملية فلتت أوى مبأش مجرد تمويل لحملات انتخابية .. ده زى ما بتقول نورينا اصبح رجال الاعمال هم السياسيين غير المنتخبين والسفراء والدبلوماسيين غير الرسميين .. وعلشان تعرف ان الخيبة والوكسة مش خيبتنا احنا بس ولو أن خيبتهم هما السبت والاحد واحنا خبيتنا موردتش على حد  لكن شوف مثلا إزاى رجال الاعمال بيلعبوا بالبيضة والحجر فى عالم رجال السياسة فيه عاملين زى البطة البلدى اللى لا بتحل ولا تربط .. وتديك ( نورينا) مثال بالاعلامي الروسى بوريس بيرسوفيسكي اللى شارك فى اطلاق سراح 50 رهينة من الشيشان .. ومن غير لا سحر ولا شعوذة .. ونجح فى اللى فشل غيره من السياسيين فى تحقيقه .

فعالم زى ده من بتاع (( دعه يعمل دعه يمر )) يتحكم فيه رجال الاعمال فى كل شىء ..هل تتوقع مثلا فيه مكان للفقير ! .. أو فيه مكان للأخلاق ! .. دلوقت رجال الاعمال ورجال السياسية بأه زيتهم فى دقيقهم .. وأنت يا غلبان لا معاك لا زيت ولا دقيق ..بس لازم تعرف انها مش سايبه واحنا كشعوب مش ساكتين فإحنا متمسكين بموقفنا فلن نتلولو ..ولن نتلحلح ..ولن نتبحبح !

((كيـــــــمو))